ವಿಶೇಷ ವರದಿ: ಮುಳಬಾಗಿಲಿನಲ್ಲಿ ಆಡಳಿತ ಯಂತ್ರ ಸಂಪೂರ್ಣ ವಿಫಲ - ಶಾಸಕರ ಅಸಹಾಯಕತೆ, ಅಧಿಕಾರಿಗಳ ದರ್ಬಾರ್!

ವಿಶೇಷ ವರದಿ: ಮುಳಬಾಗಿಲಿನಲ್ಲಿ ಆಡಳಿತ ಯಂತ್ರ ಸಂಪೂರ್ಣ ವಿಫಲ - ಶಾಸಕರ ಅಸಹಾಯಕತೆ, ಅಧಿಕಾರಿಗಳ ದರ್ಬಾರ್!

ಮುಳಬಾಗಿಲು: ಸತತ ಮೀಸಲು ಕ್ಷೇತ್ರವಾಗಿರುವ ಮುಳಬಾಗಿಲು ತಾಲೂಕಿನಲ್ಲಿ, ದಲಿತ ವರ್ಗದಿಂದ ಆಯ್ಕೆಯಾಗಿ ಬಂದ ಶಾಸಕ ಸಮೃದ್ಧಿ ವಿ. ಮಂಜುನಾಥ್ ಅವರ ಅಸಹಾಯಕತೆಯ ಆಕ್ರಂದನವು ಈಗ ಜಗಜ್ಜಾಹೀರಾಗಿದೆ. ಇದೊಂದು ಅತ್ಯಂತ ಚಿಂತಾಜನಕ ಬೆಳವಣಿಗೆಯಾಗಿದ್ದು, ಮುಂಬರುವ ಚುನಾವಣೆಯಲ್ಲಿ ಜನಸಾಮಾನ್ಯರು ಎಂತಹ ನಾಯಕರನ್ನು ಚುನಾಯಿಸಬೇಕು ಎಂಬ ಗೊಂದಲಕ್ಕೆ ಮತ್ತು ಆತಂಕಕ್ಕೆ ಕಾರಣವಾಗಿದೆ.

ಭ್ರಷ್ಟಾಚಾರದ ಎದುರು ಮಂಡಿಯೂರಿದರೇ ಶಾಸಕರು?

ಈ ಆತಂಕಕ್ಕೆ ಪುಷ್ಠಿ ನೀಡುವಂತೆ, ಇತ್ತೀಚೆಗೆ ನಡೆದ ಪ್ರಗತಿ ಪರಿಶೀಲನಾ ಸಭೆಯಲ್ಲಿ ತಾಲೂಕು ದಂಡಾಧಿಕಾರಿಗಳಾದ ಗೀತಾ ಅವರ ಉಪಸ್ಥಿತಿಯಲ್ಲೇ ಶಾಸಕರು ಆಡಿದ ಮಾತುಗಳು ತಾಲೂಕಿನ ದೌರ್ಭಾಗ್ಯವನ್ನು ಎತ್ತಿ ತೋರಿಸಿವೆ. ತಾಲೂಕಿನ ರೆವಿನ್ಯೂ ಇನ್ಸ್‌ಪೆಕ್ಟರ್‌ಗಳು (RI) ತಮಗಿಷ್ಟ ಬಂದಂತೆ ವರ್ತಿಸುತ್ತಾ, ಬೆಂಗಳೂರಿನ ಹಣವಂತರಿಗೆ ಸರ್ಕಾರಿ ಜಮೀನುಗಳನ್ನು ಭ್ರಷ್ಟಾಚಾರದ ಮೂಲಕ ಮಾಡಿಕೊಡುತ್ತಿದ್ದಾರೆ ಎಂದು ಸ್ವತಃ ಶಾಸಕರೇ ಮಾಧ್ಯಮದ ಮುಂದೆ ಒಪ್ಪಿಕೊಂಡಿದ್ದಾರೆ.

ಅಷ್ಟೇ ಅಲ್ಲದೆ, ಪಿಡಿಒಗಳು ಕಚೇರಿಯಲ್ಲಿ ನಡೆಯುವ ಭ್ರಷ್ಟಾಚಾರದ ವಿಷಯಗಳನ್ನು ಹೊರಗೆ ಹೇಳುತ್ತಿರುವುದರಿಂದ ಅನೇಕರು ಮಾಹಿತಿ ಹಕ್ಕಿನ (RTI) ಅಡಿಯಲ್ಲಿ ಅರ್ಜಿ ಹಾಕಿ ಅಧಿಕಾರಿಗಳಿಗೆ ಕಷ್ಟಕೊಡುತ್ತಿದ್ದಾರೆ ಎಂಬ ವಿಚಿತ್ರವಾದ ಅಳಲನ್ನು ಶಾಸಕರು ತೋಡಿಕೊಂಡಿದ್ದಾರೆ. ಕಾರ್ಯಾಂಗದ ಜವಾಬ್ದಾರಿಯನ್ನು ಮರೆತು, ತಪ್ಪು ಮಾಡುತ್ತಿರುವ ಪಿಡಿಒಗಳನ್ನು ರಕ್ಷಿಸುವ ಧಾಟಿಯಲ್ಲಿ, "ಅಧಿಕಾರಿಗಳೆಲ್ಲಾ ಒಂದು ಕುಟುಂಬವಿದ್ದಂತೆ, ವಿಷಯಗಳನ್ನು ಗೌಪ್ಯವಾಗಿಡಿ" ಎಂದು ಹೇಳುತ್ತಾ, ತಮ್ಮ ಹಿಡಿತದಲ್ಲಿ ಏನೂ ಇಲ್ಲ ಎಂಬ ನೋವನ್ನು ವ್ಯಕ್ತಪಡಿಸಿರುವುದು ಎಷ್ಟರಮಟ್ಟಿಗೆ ಸರಿ? ಜನರಿಗೆ ನ್ಯಾಯ ಕೊಡಿಸಬೇಕಿದ್ದ ಮೀಸಲು ಕ್ಷೇತ್ರದ ದಲಿತ ನಾಯಕ ಹಾಗೂ ಜನಪ್ರಿಯ ಶಾಸಕರು ಭ್ರಷ್ಟಾಚಾರದ ಮುಂದೆ ಹೀಗೆ ಅಸಹಾಯಕತೆ ವ್ಯಕ್ತಪಡಿಸುವುದು ಆಡಳಿತದ ದಿವಾಳಿತನವನ್ನು ಎದ್ದು ಕಾಣುವಂತೆ ಮಾಡುತ್ತಿದೆ.

ಜನರ ಕೈಗೆ ಸಿಗದ ನಾಯಕ - ಆಡಳಿತದ ಮೇಲೆ ಹಿಡಿತವಿಲ್ಲ!

ಒಬ್ಬ ಜವಾಬ್ದಾರಿಯುತ ಜನಪ್ರತಿನಿಧಿಯಾಗಿ, ಸಂವಿಧಾನದ ಚೌಕಟ್ಟಿನಲ್ಲಿ ಕೆಲಸ ಮಾಡಬೇಕಿದ್ದ ಶಾಸಕರು, ತಮ್ಮ ಮುಂದೆಯೇ ಅಧಿಕಾರಿಗಳು ತಪ್ಪು ಮಾಡುತ್ತಿದ್ದಾರೆ ಎಂದು ತಿಳಿದಿದ್ದರೂ, ಅವರ ಮೇಲೆ ಯಾವುದೇ ಕಾನೂನು ಕ್ರಮ ಜರುಗಿಸದೆ ಕೇವಲ ಗೊಣಗಾಟಕ್ಕೆ ಸೀಮಿತವಾಗಿದ್ದಾರೆ. ಚುನಾವಣಾ ಪೂರ್ವದಲ್ಲಿ "ತಾಲೂಕಿಗೆ ನಾನಿದ್ದೇನೆ" ಎಂದು ನಂಬಿಕೆ ಹುಟ್ಟಿಸಿದ್ದ ಶಾಸಕರು, ಗೆದ್ದ ನಂತರ ಅತಿ ಹೆಚ್ಚು ಸಮಯ ತಾಲೂಕಿನಲ್ಲಿ ಕಾಣಸಿಗದೆ, ಜನರ ಕೈಗೆ ಸಿಗದೆ ಮಾಯವಾಗಿದ್ದಾರೆ. ಸರ್ಕಾರಿ ಸಂಬಳ ಮತ್ತು ಸವಲತ್ತುಗಳನ್ನು ಪಡೆಯುತ್ತಿದ್ದರೂ, ಕಚೇರಿಯಲ್ಲಿ ಸಾರ್ವಜನಿಕರಿಗೆ ಸಮಯ ಕೊಡದೆ, ಆಡಳಿತಕ್ಕೆ ಗಮನ ನೀಡದೆ ಇರುವುದೇ ಇಂದಿನ ಅವರ ಈ ಅಸಹಾಯಕ ಪರಿಸ್ಥಿತಿಗೆ ಕಾರಣ ಎಂದು ಜನತೆ ಮಾತನಾಡಿಕೊಳ್ಳುತ್ತಿದ್ದಾರೆ.

ಇದರ ನಡುವೆ, ಕಳೆದ ಚುನಾವಣೆಯಲ್ಲಿ ಸೋತಿದ್ದರೂ ಅತಿ ಹೆಚ್ಚು ಮತ ಪಡೆದ ಎರಡನೇ ಅಭ್ಯರ್ಥಿಯಾಗಿರುವ, ಪ್ರಸ್ತುತ ತಾಲೂಕಿನ ವಿರೋಧ ಪಕ್ಷದ ಜವಾಬ್ದಾರಿ ಹೊತ್ತಿರುವ ಕಾಂಗ್ರೆಸ್ ಪಕ್ಷದ ಆದಿನಾರಾಯಣ ಅವರೇ ಹಾಲಿ ಶಾಸಕರ ಅಸಹಾಯಕತೆಗೆ ಮೂಲ ಕಾರಣ ಎಂಬ ಮಾತುಗಳು ಕೇಳಿಬರುತ್ತಿವೆ. ಕೇವಲ ಹೆಸರಿಗಷ್ಟೇ ಶಾಸಕರು ಚುನಾವಣೆ ಗೆದ್ದಿದ್ದರೂ ಸಹ, ಸರ್ಕಾರದ ಒತ್ತಡದಿಂದಾಗಿ ಆಡಳಿತದಲ್ಲಿ ಯಾವುದೇ ಕೆಲಸಗಳನ್ನು ಮಾಡಲು ಇವರಿಗೆ ಬಿಡುತ್ತಿಲ್ಲ ಎಂಬುದು ಸಾರ್ವಜನಿಕರಲ್ಲಿ ಸೃಷ್ಟಿಯಾಗಿರುವ ವಾಸ್ತವವಾಗಿದೆ.

ಡಿ.ಕೆ. ರವಿ ಅವರ ಆದರ್ಶಕ್ಕೆ ಎಳ್ಳುನೀರು: ಕೆರೆ ನುಂಗಿದವರ ಆರ್ಭಟ!

ಇದಕ್ಕೊಂದು ಆಘಾತಕಾರಿ ನಿದರ್ಶನವೂ ಇದೆ. ಈ ಹಿಂದೆ ದಕ್ಷ ಅಧಿಕಾರಿ ಡಿ.ಕೆ. ರವಿ ಅವರು ತಮ್ಮ ನಿಸ್ವಾರ್ಥ ಸೇವೆಯಿಂದ ಸಂವಿಧಾನವನ್ನು ಎತ್ತಿಹಿಡಿದು, ಭ್ರಷ್ಟಾಚಾರವನ್ನು ಮಟ್ಟಹಾಕಿ ಕೆರೆ-ಕುಂಟೆ ಮತ್ತು ಸರ್ಕಾರಿ ಭೂಮಿಗಳನ್ನು ಕಾಪಾಡಿದ್ದರು. ಅವರು ಅಂದು ತಡೆಹಿಡಿದಿದ್ದ ನಿರ್ಮಾಣ ಕಾರ್ಯಗಳು, ಇಂದು ರಾಜಾರೋಷವಾಗಿ ನಡೆದಿವೆ. ಪ್ರಸ್ತುತ ನಮ್ಮ ಜನಪ್ರಿಯ ಶಾಸಕ ಸಮೃದ್ಧಿ ಮಂಜುನಾಥ್ ಅವರು ಅಧಿಕಾರಕ್ಕೆ ಬಂದು ಎರಡುವರೆ ವರ್ಷಗಳಾದರೂ, ಡಿ.ಕೆ. ರವಿ ಅವರು ನಿಲ್ಲಿಸಿದ್ದ ಕೆರೆಯ ಮೇಲಿನ ಸಮುದಾಯ ಭವನವನ್ನು ಇಂದು ಅಕ್ರಮವಾಗಿ ಕಟ್ಟಿಸಿ ಮುಗಿಸಲಾಗಿದೆ.

ನಗರದ ಕೆರೆಗಳು ಮತ್ತು ಬಫರ್ ಜೋನ್‍ಗಳಲ್ಲಿ ಅನೇಕ ಒತ್ತುವರಿಗಳಾಗಿದ್ದರೂ, ಅದನ್ನು ಪ್ರಶ್ನಿಸುವ ನೈತಿಕತೆಯನ್ನು ಶಾಸಕರು ಕಳೆದುಕೊಂಡಂತಿದೆ. ಕೇವಲ ಆಶ್ವಾಸನೆ ನೀಡುತ್ತಾ, ಇಲ್ಲಿಯವರೆಗೂ ಕೆರೆಗಳನ್ನು ರಕ್ಷಿಸುವ ಅಥವಾ ಒತ್ತುವರಿ ತೆರವುಗೊಳಿಸುವ ಯಾವುದೇ ಪ್ರಕ್ರಿಯೆ ನಡೆಸದಿರುವುದು, ಜನಸಾಮಾನ್ಯರಲ್ಲಿ ಶಾಸಕರ ಮೇಲೆ ಅವಿಶ್ವಾಸ ಮೂಡುವಂತೆ ಮಾಡಿದೆ. ಶಾಸಕರು ಕೇವಲ ತಮ್ಮ ಹಿಂದಿರುವ ನಾಲ್ಕೈದು ಜನರಿಗೆ ಮಾತ್ರ ಸೀಮಿತವಾಗಬಾರದು, ತಾಲೂಕಿನ ಪ್ರತಿಯೊಬ್ಬ ನಿಷ್ಠಾವಂತ ಪ್ರಜೆಗೂ ಸಿಗಬೇಕು ಎಂಬುದು ಜನರ ಆಸೆಯಾಗಿದೆ.

ಮಕ್ಕಳಿಗೆ ಚಾಕ್ಲೇಟ್ ಕೊಟ್ಟು ಹೊರಹಾಕಿದಂತೆ ಶಾಸಕರನ್ನು ಹೊರಗಿಟ್ಟರು!

ಮತ್ತೊಂದು ಅತ್ಯಂತ ಆಘಾತಕಾರಿ ಹಾಗೂ ನಾಚಿಕೆಗೇಡಿನ ಸಂಗತಿ ಎಂದರೆ, ಕಣ್ಣಿಗೆ ಕಂಡರೂ ಕಾಣದಂತೆ ಕೆರೆಯ ಮೇಲೆ ಸಮುದಾಯ ಭವನವನ್ನು ಕಟ್ಟಲು ಅವಕಾಶ ಮಾಡಿಕೊಟ್ಟ ಇದೇ ಶಾಸಕ ಸಮೃದ್ಧಿ ಮಂಜುನಾಥ್ ಅವರನ್ನು, ಅದೇ ಸಮುದಾಯ ಭವನದ ಉದ್ಘಾಟನೆಗೆ ಕರೆಯದೆ ಅವಮಾನಿಸಲಾಗಿದೆ! "ಚಿಕ್ಕ ಮಕ್ಕಳಿಗೆ ಚಾಕ್ಲೇಟ್ ಕೊಟ್ಟು ಎಳೆದು ಹೊರಹಾಕುವಂತೆ" ತಂತ್ರಗಾರಿಕೆ ನಡೆಸಿ, ಕ್ಷೇತ್ರದ ಶಾಸಕರನ್ನೇ ಹೊರಗಿಟ್ಟು, ಕೇವಲ ಕಾಂಗ್ರೆಸ್ ಸಚಿವರು ಮತ್ತು ಅಧಿಕಾರಿಗಳ ನೇತೃತ್ವದಲ್ಲಿ ಉದ್ಘಾಟನೆ ನೆರವೇರಿಸಲಾಗಿದೆ.

ಸಂವಿಧಾನಾತ್ಮಕವಾಗಿ ಪ್ರಾಮಾಣಿಕತೆಯಿಂದ ಆಡಳಿತ ನಡೆಸಬೇಕಿದ್ದ ಕೋಲಾರ ಜಿಲ್ಲಾಧಿಕಾರಿಗಳು ಮತ್ತು ಮುಳಬಾಗಿಲು ತಹಶೀಲ್ದಾರ್ ಗೀತಾ ಅವರ ಸಮ್ಮುಖದಲ್ಲಿಯೇ ಈ ಪ್ರಹಸನ ನಡೆದಿದೆ. ಸಾರ್ವಜನಿಕ ಆಸ್ತಿಯಾದ ಕೆರೆಯ ಮೇಲೆ, ಭಾರತದ ಸರ್ವೋಚ್ಚ ನ್ಯಾಯಾಲಯದ ತೀರ್ಪಿನ ವಿರುದ್ಧ ಮತ್ತು ಸಂವಿಧಾನದ ಅಸ್ಮಿತೆಯನ್ನೇ ಪ್ರಶ್ನಿಸುವಂತೆ ರಾಜಾರೋಷವಾಗಿ ಕಟ್ಟಡ ನಿರ್ಮಿಸಿ, ಉದ್ಘಾಟನೆ ಮಾಡಿರುವುದು ಇಡೀ ತಾಲೂಕಿಗೆ ನಾಚಿಕೆಗೇಡಿನ ಸಂಗತಿ. ಸಾರ್ವಜನಿಕ ಕ್ಷೇತ್ರದಲ್ಲಿ ಇನ್ನು ಏನೇನನ್ನು ನೋಡಬೇಕೋ ಎಂದು ಜನರು ಅಸಹ್ಯ ಪಡುತ್ತಿದ್ದಾರೆ.

ಬಕೆಟ್ ಹಿಡಿಯುವ ಸಂಸ್ಕೃತಿ ಮತ್ತು ಮಾಧ್ಯಮದ ಜಾಣ ಕುರುಡು

ಇದು ಇಷ್ಟಕ್ಕೆ ನಿಲ್ಲದೆ, ತಾಲೂಕಿನಲ್ಲಿ ಜೆಡಿಎಸ್ ಮತ್ತು ಕಾಂಗ್ರೆಸ್ ಪಕ್ಷಗಳ ಮುಂದಿನ ಅಭ್ಯರ್ಥಿಗಳನ್ನು ಓಲೈಸುವ, ಬಕೆಟ್ ಹಿಡಿಯುವ ಮತ್ತು ಹಣಕ್ಕಾಗಿ ಸ್ವಾಭಿಮಾನ ಮರೆಯುವ ಜನರ ಸಂಖ್ಯೆ ಹೆಚ್ಚುತ್ತಿರುವುದು ವಿಷಾದನೀಯ. ಮುಳಬಾಗಿಲು ನಗರದಲ್ಲಿ ಇಷ್ಟೆಲ್ಲಾ ಗಂಭೀರ ವಿಷಯಗಳು ನಡೆಯುತ್ತಿದ್ದರೂ, ಪ್ರಬುದ್ಧವಾಗಿ ಕರ್ತವ್ಯ ನಿರ್ವಹಿಸದೆ ಜಾಣ ಕುರುಡು ಪ್ರದರ್ಶಿಸುತ್ತಿರುವ ಇತರೆಲ್ಲಾ ಮಾಧ್ಯಮಗಳಿಗೂ ನಮ್ಮ 'ಭಾರತ್ ಮೀಡಿಯಾ' ವತಿಯಿಂದ ವ್ಯಂಗ್ಯಭರಿತ "ಹ್ಯಾಟ್ಸ್ ಆಫ್" (Hats off) ಹೇಳಲೇಬೇಕಿದೆ.

- ವರದಿ: Rohann kumar K